Łužiske liški –

EC Bad Nauheim 5:4 (1:2, 3:1, 1:1)

Łužiske liški su minjeny pjatk napjatu domjacu hru w DEL2 přećiwo EC Bad Nauheimej 5:4 dobyli. Mjez přihladowarjemi běchu wjac hač 50 šulerjow Wyšeje šule Slepo a jich starši. Zamołwići Liškow běchu jim zastupne lisćiki darili, dokelž wobsteji mjez towarstwom a šulu kooperacija. Mustwo Christofa Kreutzera rozsudźi partiju hakle jědnaće sekundow do kónčneje sireny.

Cyłkownje šěsć hrajerjow bě so do zahajenja hry do kadra Běłowodźanow nawróćiło. Bad Nauheim startowaše z tójšto ćišćom a nawjedowaše hižo w 5. min. přez Christophera Fischera. Krótko po tym zo běchu Liški puk zhubili powyši Rik Gaidel na 0:2 (8. min.). Z hrajerjom wjac na lodźe docpě Charlie Jahnke po přihrawce Markusa Freisa w 10. min. prěnje wrota za Łužičanow. W druhej třećinje Liški jasnje lěpje wustupowachu. W 24. min. Alexander Dosch po přihrawce Adama Bradyja 2:2 wuruna.

Lennardej Nieleckej poradźi so w 33. min. po pasu Georgiyja Saakyana nawjedowanje 3:2. Jenož něhdźe 30 sekundow pozdźišo pak Jordan Hickmott 3:3 wuruna. W 37. min. docpě Hannu Tripcke 4:3 a z tym znowa nawjedowanje za domjacych.