Budyšin (SN/MiR). Kónc je z falšnej hru. Finale lětušeje ptačokwasneje sezony za dorosćacych a dorosćenych přihladowarjow je Serbski ludowy ansambl (SLA) wčera w Slepjanskim kulturnym centrumje wuhotował. Mjez wopytowarjemi bě tež tójšto dźěći. Dohromady jědnaće króć je wuměłski cyłk inscenaciju lětsa předstajił. Na žurlach w Delnjej, srjedźnej a Hornjej Łužicy je sej na wšěch 1 500 zajimcow wječorny program ansamblowcow wobhladało. W Radworju a Chrósćicach poskićichu po tym reje ze serbskej kapału. Wosebje je so wopytowarjam scena spodobała, kotraž hłowneju protagonistow Lenku (Božena Bjaršec) a Frida (Marko Bulank-Paška j.h.) do swěta Čorneje młynkoweje wjedźe. Wjacori wopytowarjo předstajenja sobotu popołdnju na žurli SLA měnjachu, zo bě program trochu krótki. Skutkowny bě – kaž druzy wobkrućichu – finale, Kulowski kwas. „To drje njeje nowostka, štož smy pokazali“, tak rěčnik SLA Stefan Cuška-Malink, „tola wot něhdyšeho dramaturga SLA Jana Domaški zestajene sceny njeběchu dlěje w našich programach widźeć a su tuž, po wobdźěłanju komponista Jana Cyža, dobry wothłós žnjeli.