Lětsa diskutuja wo generaciji Ž, perspektiwje literatury a šansach žonow

Budyšin/Chrósćicy (SN/mb). Witajće na Serbsku debatu lěta 2026! Třeće lěto pospochi so rjad zarjadowanjow pod tutym hesłom wotměje. Direktor Sakskeje krajneje centrale za politiske kubłanje (SLpB), dr. Roland Löffler, zwěsća: „Format a partnerstwo wuhotowarjow stej mjeztym wupruwowanej, publikumej so poskitk lubi. To mje wjeseli. Zaso dźe wo aktualne towaršnostne serbske temy za Serbow a ze Serbami, serbsce a tež němsce.“ SLpB zarjaduje tež lětuši rjad w kooperaciji ze Serbskimi Nowinami (SN) a Załožbu za serbski lud. Tónraz, tak Löffler, „kročimy na tróšku hinašich pućach: Dźiwamy na žiwjenske začuće młodeje generacije a mnohotnosć splahow, na runoprawosć a nowe trendy w serbskej kulturje. Politiske kubłanje ma wjele fasetow, hdyž so aktualitam towaršnosće wěnuje – to je maćizna za intensiwne debaty. Budźe zajimawe.“