Slěborny jubilej globalneje a lětdźesatkaj hornjoserbskeje encyklopedije

Budyšin (SN/bn). Jubileje (dotal) sobu najwuspěšnišeho a najdołhodobnišeho digitalneho projekta běchu Budyskemu staroměšćanskemu towarstwu ze składnosću, wuhotować wosebity přednošk. Před 25 lětami bu mjenujcy portal Wikipedija załoženy, najprjedy w ryzy jendźelskej wersiji. Němskorěčna warianta slědowaše něšto měsacow pozdźišo, zhromadnje mjez druhim z wotpowědnikomaj w francošćinje a katalanšćinje. Zo sta so na kóncu mjenowana wersija z prěnjej w „strukturelnje mjeńšinowej rěči“ njeje z připadom, wšako bě zwoprědka „ze zaměrom iniciatorow, wuwiwać wotewrjenu, wšitkim zajimcam wšudźe a stajne přistupnu, wobstajnje aktualizowanu encyklopediju, wobkedźbowaca wšitke rěče swěta“, wuzběhny referent Julian Nyča. Tónle wotmysł drje njebu dotal doskónčnje zwoprawdźeny, wšako jewja so z „globalnje něhdźe 6 000 rěčow, při čimž so tale ličba dźeń a bóle pomjeńša, dotal ‚jenož‘ něhdźe 300“.