Po krótkej chorosći zemrě wutoru, 24. małeho róžka, w Budyskej hladarni serbski žurnalist, publicist, přełožowar, literarny kritikar a dramatikar kaž tež lawreat Myta Ćišinskeho a Literarneho myta Domowiny Cyril Kola w starobje 98 lět.

Cyril Kola je so 18. julija 1927 jako najstarši ze štyrjoch synow do serbskeje swójby w Radworju narodźił. Jeho nan bě małoratar, zwóńk wosadneje cyrkwje a swěrny dopisowar serbskeho dźenika. Mać spěwaše 50 lět zahoriće w Radworskim chórje Meja. Zhromadnje z mandźelskim je tež swojim synam serbski spěw posrědkowała. Přez swójbne kulturne žiwjenje, ale tež přez pilne ratarske dźěło so w hólčecu hižo w młodych lětach radosć nad rjanosću serbskeje rěče a łužiskeje přirody zakorjeni.