Kretschmer a wědomostnicy w Berlinje Einsteinowy teleskop předstajili

Berlin (SN/MiP). Pod hesłom „Uniwersum pod zemju sej wotkrywać – Sakska na grawitaciskej žołmje“ je sakski ministerski prezident Michael Kretschmer (CDU) wčera na „kosmiski wječor“ do Berlinskeho zastupnistwa Swobodneho stata pola Zwjazka přeprosył. W swojim powitanju wujasni wón wulkej ličbje přitomnych – žurla běše přepjelnjena – kotru konkretnu temu chcedźa wědomostnicy a slědźerjo we wobłuku podijoweje diskusije rozjimać: Europski projekt Einsteinoweho teleskopa, za kotruž su so kraj Sakska, Sardiniska a Nižozemski euroregion Maas-Ryn powabili. „Zakład za powabjenje pak je puć, na kotryž smy so w zwisku ze změnu strukturow podali. Cyle wědomje smy so za natwar Astrocentruma Łužica (DZA) rozsudźili, kotryž je prof. dr. Günther Hasinger, něhdyši nawoda Europskeje swětnišćoweje organizacije ESA a dźensniši direktor DZA iniciěrował“.