Kóžda wjeska wokoło Wojerec ma swójske jutrowne nałožki a je wot generacije ke generaciji dale dawa. W Čornym Chołmcu stej to krjepjenje jutrowneje wody a šibałe pryzle młodych wjesnjanow. Wone k jutram słušeja a su wuraz zhromadnosće.

Zdypkom w połnocy pacholjo zwony cyrkwje zwonja. Tak so w Čornym Chołmcu ze swětłymi zwukami zwonow ranje jutrowničku započina. Wjesołe poselstwo Jezusoweho zrowastanjenja ma tež we wjesnymaj kolonijomaj Čorneho Chołmca na Pěcarjowej horje (Petzerberg) a Kózłu (Koselbruch) słyšeć być. Na pasionske spěwanje žonow a holcow sćěhuje tradicija krjepjenja jutrowneje wody. „Njewudate holcy podadźa so k Čornochołmčanskim žórłam. Wone čerpaja z karanami ,jutrownu wodu‘ z wjesneje hrjebje“, wopisujetej Sabrina Wagner, kotraž je předsydka towarstwa skupiny za nałožki Krabat Čorny Chołmc, a čłonka zjednoćenstwa Silvia Stephan.