Parlamentariska přirada załožby so wčera w Berlinje schadźowała

Berlin (SN/mb). Prěni raz w nowej wólbnej periodźe je so wčera Parlamentariska přirada Załožby za serbski lud pod nawodom amtěrowaceho předsydy Marka Šimana (CDU) schadźowała. Čłonojo gremija ze Sakskeje, Šiman a Doreen Schwietzer (AfD), a z Braniborskeje, Lars Kaczmarek (SPD) a Falk Peschel (BSW), běchu do zastupnistwa Sakskeje w Berlinje přichwatali. Městnje zastupjerjow zwjazkoweho sejma stej hišće njewobsadźenej, dokelž njeje parlament po lońšich dočasnych wólbach dotal nikoho za to wuzwolił.

Na dnjowym porjedźe steješe pjate statne zrěčenje wo financowanju załožby, kotrež je drje mjez Braniborskej, Sakskej a Zwjazkom dojednane, ale dotal hišće nic oficielnje podpisane. Kaž Marko Šiman Serbskim Nowinam (SN) praji, wočakuja doskónčnu płaćiwosć w běhu přichodneju tydźenjow. Zwjazkowy nutřkowny minister je zrěčenje podpisał, tuchwilu leži dokument w Braniborskej a pućuje potom do Sakskeje. Nětko wo to dźe, ze srědkami skedźbliwje a efektiwnje wobchadźeć, tak Šiman.