Dramaturgija zhromadneho němsko-brazilskeho termina překwapiła

Hannover (dpa/SN). Brazilska je partnerski kraj lětušich Hannoverskich wikow. Tuž běše tež prezident južnoameriskeho stata Luiz Inácio Lula da Silva na industrijowe wiki z mjezynarodnym wuznamom přijěł. Zhromadnje ze zwjazkowym kanclerom Friedrichom Merzom (CDU) wiki minjenu sobotu swjatočnje wote­wrě. Wčera měještaj wobaj na Hannoverskich wikach dalši zhromadny termin. Tola hižo po něšto mjeńšinach poda so zaso kóždy sam na ekskursiju po wustajenskich halach. To je přewšo njewšědne, wšako měješe termin wuraz wuskeho partnerstwa mjez krajomaj być. Mjeztym zo wopyta brazilski prezident brazilskich wustajerjow, wobhlada sej kancler Merz wustajenišća z roboterowej a dalšej nowej technologiju. Jeju zhromadny wopyt wikow běše de fakto hižo zakónčeny, prjedy hač bě so prawje zahajił. Tež zastojnicy policije na wikach kaž tež organizatorojo wikow so nad njewočakowanym wotběhom zetkanja dźiwachu. Tajke něšto woni hišće dožiwili njejsu, rě­kaše.