Serbski oratorij publikum w Budyšinje, Drježdźanach a Choćebuzu zahorił
Budyšin (SN/bn). Dołhi rynk zajimcow za poslednje zastupne lisćiki před Budyskej tachantskej cyrkwju swj. Pětra bě minjeny pjatk prěnja pokazka na wulki wjeršk, kajkehož so sobuskutkowacy nadźijachu a kajkiž publikum wočakowaše. W takrjec hač pod třěchu kopaće połnym ewangelskim dźělu Božeho domu předstajichu cyłkownje něhdźe 120 čłonkow a čłonow pjećoch łužiskich chórow, štyrjo solisća a nimale połsta instrumentalistow oratorij Korle Awgusta Kocora a Handrija Zejlerja „Nalěćo“ we wersiji Jana Bulanka za spěwarjow a wulki orchester. Mjeńšiny trajacy přiklesk a trójna „Sława“ wopytowarjow po fulminantnej kónčnej sadźbje „Derje, derje je na zemi“ dowolatej posudk přewšo poradźeneho koncerta. Za přeswědčacy wuměłski wukon bě hłownje dirigentka Katharina Dickopf zamołwita, kotraž wědźeše rozdźělne ćělesa wuspěšnje w zmysle słowa hromadu zwjesć.
