Njezbožo w Černobylu: Ludźo w NDR jenož mało wo podawku zhonili

Budyšin (SN/lmc/hn/jp). Štož je so wčera před 40. lětami w Černobylu stało, běše wjac hač proste njezbožo – běše to nuklearna apokalypsa. Reaktor čisło 4 rozbuchny a žana technika swěta njezamó zahubje zadźěwać. Wulke płoniny buchu radioaktiwnje zanjerodźene, tysacy zemrěchu, tysacy so zranichu a schorjechu. Wuskutki katastrofy sahaja hač do dźensnišeho.

Njekontrolowany test bě rjećazowu reakciju wony dźeń zahajił. Při detonaciji, kotraž slědowaše, rozbuchnychu tysac tonow ćežke škitne woclobetonowe murje. Radioaktiwna mróčel so spěšnje rozpřestrěwaše a zanjerodźi něhdźe 150 000 kwadratnych kilometrow krajiny. Něhdźe 350 000 ludźi dyrbješe atomarneho zanjerodźenja dla swoju domiznu wopušćić. Radioaktiwnu mróčel ćěrjachu wětry najprjedy do zapada, do Europy, potom na wuchod do Aziskich krajow. Nic jenož zamołwići w tehdyšim Sowjetskim zwjazku tomu mjenje abo bóle bjezmócni přihladowachu, tež w Němskej njewědźachu, kak postupować. Nichtó na tajke radioaktiwne njezbožo přihotowany njebě.