„Muzej z wjeselom sej wotkryć“ bě hesło lětušeho Mjezynarodneho dnja muzejow, kotryž bě wopytowarjam po cyłym swěće institucije wčera zdarma spřistupnił. W Němskej, kotraž wukonješe z prezidentom Zwjazkoweje rady dr. Andreasom Bovenschulte patronatstwo, so na nim něhdźe 7 100 muzejow wobdźěli, mjez druhim wjacore łužiske.

Choćebuz/Budyšin (SN/bn). Mnohe muzeje běchu składnostnje akciskeho dnja z wosebitymi poskitkami wabili. W konteksće drje najmoderniši přiwabi syły zajimcow do Braniborskeho krajneho muzeja za moderne wuměłstwo w Choćebuzu. Interaktiwne stacije hosćom mjez druhim zmóžnichu, so na polu zwukoweho designa wuspytać abo tworićelsku móc kumštneje inteligency dožiwić. Pod hesłom „Sorbmaxxing a serbski slay“ sposrědkowachu wuměłc Tamko Hägler a zastupjerki Kolektiwa Wakuum někotružkuli (delnjo)serbsku wokablu při „maksiměrowanju wšědneho outfita ze serbskimi elementami“.