74 000 wěriwych na 104. zjězdźe katolikow zhromadnje swjećiło a diskutowało
Würzburg (dpa/SN). Z bojowniskim prědowanjom je biskop dr. Heiner Wilmer, předsyda Němskeje konferency biskopow (DBK), na zakónčacej Božej mši lětuši 104. zjězd katolikow we Würzburgu zakónčił. Wón namołwješe wěriwych a politiku, so aktiwnišo na dobro ćerpjacych angažować: „Swět so pali. Tuchwilu najwjetšu čłowjesku katastrofu dožiwjamy w Sudanje. (…) My pak smy dźěl tutoho swěta. Woheń njezhašeš z tym zo přihladuješ!“ Ze swojim poselstwom poćahowaše so na hesło lětušeho zjězda katolikow „Měj zmužitosć, stań!“. Dohromady 74 000 wěriwych je so wot srjedy hač do wčerawšeho na nim wobdźěliło, mjez nimi běchu tež zwjazkowy kancler Friedrich Merz (CDU), zwjazkowy prezident Frank-Walter Steinmeier, prezidentka zwjazkoweho sejma Julia Klöckner (CDU) a bayerski ministerski prezident Markus Söder (CSU). Mjez dohromady 900 zarjadowanjemi běchu tež podijowe diskusije, na kotrychž so politiscy zamołwići z cyrkwinskimi zamołwitymi a wěriwymi do rozmołwy dachu.
