Z połnym zasadźenjom na kopanišću trenowaše zapósłanča krajneho sejma Elaine Jenčec (CDU) zašły tydźeń wutoru zhromadnje z 1. mustwom muži wokrjesneho pokalneho finalista Sokoła Ralbicy/Hórki. W srjedźišću treningoweje jednotki stejachu sprinty, wobrotniwosć a dalše intensiwne zwučowanja. Za Jenčec njewoznamjenješe to jenož sportowe wužadanje, ale zdobom zazběh do noweho formata „Kick přez wólbny wokrjes“.

Z towarstwowej turu wopytuje zapósłanča krajneho sejma Elaine Jenčec koparske towarstwa we wólbnym wokrjesu, trenuje zhromadnje z nimi a da so po tym do rozmołwy z hrajerkami, hrajerjemi a zamołwitymi. Zaměr je, towarstwa a jich dźěło direktnje zeznać a runočasnje sama sportowsce aktiwna być.

Hižo minjene tydźenje bě politikarka mjez druhim pola wšelakich mustwow, kaž na přikład w Großnaundorfje abo w Bretnig-Hauswalde, z hosćom a dósta při tym dohlad do wšědneho treningoweho dnja, dorostoweho dźěła a čestnohamtskeho angažementa.