„Spuk von draußen oder Karaseks Schatz“ rěka Němsko-Serbske ludowe dźiwadło swojej lětušej inscenaciji pod hołym njebjom, a pokazka na sławneho rubježnika so wězo připadnje njejewi. Ludowy kruch Ralpha Oehme wo „hrózbnosći Hornjeje Łužicy“ bě mjenujcy prěni, kotryž NSLDź we wobłuku Budyskeho dźiwadłoweho lěća na Hrodźe sprjewineho města pokaza. Dalši raz předstaji jón składnostnje dźesateje róčnicy zazběha tohole mjeztym wuspěšneho rjadu na samsnym městnje – tematiski nawrót k 30. narodninam njeje tuž nješarmantny. A dokelž je so w tychle třoch lětdźesatkach z wěstej tradiciju stało, w aktualnej inscenaciji mjenje abo bóle ofensiwnje citaty z předchadźacych produkcijow schować, njeje wožiwjenje rubježnika dawno jenička reminiscenca, kotruž lětuši spektakl swěrnemu přihladowarstwu skići. Wjelelětnemu wopytowarjej móhło tuž wulke wjeselo wobradźeć, tele pokazki wuhódać a přirjadować – inkluziwnje někotreježkuli hudźbneje hikawki, kriminelneho klinkačka abo cyplkojteje chronofobije.