Šulerki a šulerjo rjadownje 7 Serbskeje wyšeje šule ­Ralbicy su wot srjedy, 17. junija, do pjatka, 19. junija, w Błótach přebywali. Woni zetkachu so srjedu rano na busowym zastanišću při Wojerowskim dwórnišću, wottam jědźechu do Choćebuza. Po přestawce dźěše z busom dale do Bórkowow. W tamnišej młodowni wotpoło­žichu toboły a dźěchu k wobjedu. Přichodna stacija bě wupožčernja čołmikow. Po rozrjadowanju skupinow započa so dwuhodźinski dyrdomdej na wodźe. Při tym posłužowachu Ralbičenjo wězo sami spušćadła, zo bychu dale čołmikować móhli. Po wječeri w młodowni dachu dźeń při kopańcy a wolejbulu wuklinčeć.