Wyši koparski ligist FSV Budissa Budyšin nastaji so tež zboka hrajnišća dale na přichod a zesylnja team 1. mustwa muži. Z Franzom-Josefom Zechom a Uwe Schlenkrichom přewozmjetej angažowanej wosobinje nowe nadawki kołowokoło wyšeho ligista.

Franz-Josef Zech je swoju aktiwnu karjeru jako kopar zakónčił a so bjezposrědnje na pobóčnu liniju podał. 30-lětny budźe přichodnje jako druhi kotrenar trenarski team wokoło šeftrenarja Stevea Dieski a kotrenarja Erica Prentkeho wudospołnić. Po wjele lětach jako hrajer w sakskej amaterskej kopańcy zběra Zech z tym swoje prěnje nazhonjenja w trenarskim wobłuku a budźe swoju koparsku ekspertizu přichodnje mustwu dale dać. Za čornoběłych njeje mjeno Zech při tym njeznate: Franc-Josef je starši bratr ofensiwneho hrajerja Karla-Ludwiga Zecha a budźe přichodnje zhromadnje z nim za Budissu Budyšin skutkować. Tón jedyn na hrajnišću, tamny při pobóčnej liniji.