W pólskej Šleskej leži blisko města Bielsko-Biała­ městačko Wilamowice. W 13. lětstotku běchu so w regionje kolonisća wšelakich germanskich ludow zasydlili. Woni wuwichu cyle wosebitu rěč, mjenujcy wilamowšćinu (němsce: Wilmesaurisch abo Wymysiöeryś). To je srjedźowěkowska němčina, wobwliwowana wot delnjoněmčiny, nižozemšćiny, frizišćiny, jendźelšćiny, pólšćiny a šotisko-geliskeje rěče. Po lěće 1945 pak wilamowšćinu dźěćom hižo dale njedawachu. Wokoło lěta 2000 rěčeše jenož hišće něhdźe sto ludźi wysokeje staroby tutu rěč.