Dla lěwanćika přichadźa tuchwilu mnoho turistow do Łužicy. Štož započa so w lěće 2020 jako eksperiment, je so k wulkemu wuspěchej wuwiwało – z překwapjacym poskitkom na produktach.
Lěwanćik we Łužicy so derje wuwiwa. Agrarne drustwo z Niskeje chce plahowansku přestrjeń za njón hač do lěta 2027 potrojić. Před šěsć lětami startowa ratarski zawod w Sakskej jónkrótny modelowy projekt z fijałkojtymi kćějacymi rostlinami – po swójskich wuprajenjach na spočatku na 2,5 hektarach. „To je so jara derje wuwiło – lěpje hač běchmy na spočatku wočakowali“, zwurazni nawoda předsydstwa drustwa Andreas Graf. Minjeny tydźeń póndźelu zahajichu tam kóždolětne žně łužiskeho lěwanćika, kotryž runje najkrasnišo kćěje.
Hladajo na přiběracu suchotu je agrarne drustwo za alternatiwnymi rostlinami pytało, kotrež dadźa so nimo žita, rěpika, kukuricy a słónčnych róžow w regionje plahować. Štyri družiny lěwanćika, kotrež rostu na polu w Nišćanskim wjesnym dźělu Jězor, wuzwolichu so po kmanosći přezymowanja, Graf wopisa. Eksperiment je pokazał, zo rostliny tež přežiwja, hdyž leži sněh a mjerznje.
