Berlin/Podstupim (dpa/SN). Sprjewja ma tuchwilu tak mało wody, zo so zamołwići w Berlinje, Braniborskej a Sakskej starosća. Zhromadna dźěłowa skupina zwjazkowych krajow, kotruž su krótkodobnje zwołali, ma nětko naprawy zdźěłać, z kotrymiž móhli staw wody zwyšić. Tole zdźěla braniborski krajny zarjad za wobswět. Za srjedźnu Sprjewju płaći hižo wot spočatka junija prěni wot třoch schodźenkow niłkeje wody.

Jedyn z problemow: Suchoty w zymje a nalěću dla njejsu rěčne zawěry wosebje w hornim dźělu rěki na teritoriju Sakskeje połne dosć. „Spočatk lěća běchu składy podłu Sprjewje jenož napoł połne“, rěka ze zarjada. Tohodla njemóža wjace wody do rěki pušćić, zo bychu staw wody stabilizowali.

„Wuskutki widźimy wosebje na pegelach Lubuš (Błóta) a Große Tränke zapadnje Fürstenwalde“, zdźěla zarjad za wobswět. Wot kónca meje su w Lubušu jeničce 3,46 kubiknych metrow wotliwa wody na sekundu naměrili. Kónc julija naměrichu po dešću w Błótach znajmjeńša štyri kubikne metry na sekundu. „K přirunanju: Wot lěta 1991 do 2020 smy w Lubušu w juliju w přerězku 7,09 kubiknych metrow na sekundu naměrili.“