Festiwal šesćiměstow lětsa z fokusom na nimale zhubjenu kulturu

Strawałd/Lubij (SN/bn). Performance pod hesłom „Lubijo, kak klinčiš – Wopoj zynkow mjez dopomnjećom a přitomnosću“ tworješe wčera zazběh lětušeho festiwala šesćiměstow Přińć a woteńć. Hans Narva z mustwa organizatorow powita hosći w połnje wobsadźenym Domje Schminkeho w Lubiju, wjeselo so wosebje nad „tójšto młodymi wopytowarjemi. Předewšěm za was dźě wuhotujemy festiwal, kotryž ma tež w dźewjatym lěće narok, ‚klasisku‘ hudźbu po nowych pućach posrědkować.“ Dźakujo so wšitkim sponsoram, partneram a wuměłcam wón zarjadowanje na to oficialnje zahaji a připowědźi „napjatu akustisku jězbu w (nje)swětle zaćmića słónca“.