Před 25 lětami běchu Serbja na čole cyłokrajneho hibanja za zdźerženje małych šulow we wjesnych kónčinach Sakskeje

Chróšćan zběžk bu po rozsudźe wojowacych staršich srjedź septembra 2001 jenož „přetorhnjeny“. Jich politiske žadanja nastupajo serbske kubłanišća hač do dźensnišeho spjelnjene njejsu.

Křesćan Korjeńk je přećelny čłowjek, kiž napjate situacije měrnje zmištruje. Hdyž krótko do zahajenja šulskeho lěta 2001/2002 jako direktor Worklečanskeje srjedźneje šule ze sekretarku na staršiskej zhromadźiznje 5. lětnika w Chrósćicach steješe, wědźeše, zo so přitomni z organizatoriskimi prašenjemi puća do šule w susodnej gmejnje zaběrać nochcychu. Nawopak: Zwuraznichu, zo sej přichod za swoje dźěći na Chróšćan kubłanišću přeja. Tohodla přeswědčeny Domowinjan wuzběhny, zo jim prosće informacije posrědkuje. Domowina sedźeše tohorunja w rumnosći, team Rěčneho centruma Witaj (RCW) pod nawodom Rafaela Wowčerja. Woni běchu staršim poboku a su potom wšědne rańše protestne manifestacije na šulskim dworje sobu wuhotowali.