Budyšin (SN/bn). Ze spěwom „Hory módre, ja was znaju“ zahaja Chór Budyšin prawidłownje swój tradicionalny lěćny koncert na Čornoboze, a tomu tež wčera hinak njebě. Chwalba na tudyše wyšiny z pjera Křesćana Bohuwěra Pfula a Bjarnata Krawca dźě njehodźi so jenož wulkotnje za Dźeń Hornjeje Łužicy, z kotrymž w regionje wot lěta 2014 kołowokoło 21. awgusta na załoženje zwjazka šesćiměstow wopominaja, ale je zdobom idealny zazběh wustupa spěwarkow a spěwarjow ze sprjewineho města na „domjacej horje Budyšina“. Po jeničkej unisono zanjesenej pěsni programa slědowachu připowědźi wotpowědnje wjacore serbske, němske a mjezynarodne wjacehłósne, zdźěla solistisce wudospołnjene sadźby, kaž na přikład „Wudaj so holičo“ (Jan Pawoł Nagel), „Abschied vom Walde“ (Felix Mendlessohn Bartholdy) abo „El grillo“ (Josquin des Prez). Zhromadnje z něhdźe 60 wopytowarjemi zanjese chór nimo toho kanonaj „Dona nobis pacem“ a „Hejo, spann den Wagen an“ (wobě de facto z ludu).