Sakska strowotna ministerka Petra Köpping­ (SPD) je minjeny tydźeń w Južnej Koreji přebywała. Předewšěm chcyše wona zhonić, z kotrymi naprawami tam strowotnistwo demografiskemu wuwiću přiměrjeja. Facit wukrajneho wopyta­ je ministerka wčera wozjewiła.

Drježdźany (SN). „Južna Koreja steji hladajo­ na demografisku změnu před podobnymi wužadanjemi kaž Sakska a tež Němska. Jeje wuskutki su tam samo spěšniše a sylniše, wšako maja z wob­jimom 0,7 po cyłym swěće najnišu porodowu ratu“, Köpping w zdźělence piše. Runje tak wulka tema je potrjeba za fachowcami, kotrejž so w Južnej Koreji­ hižo wjele lět wěnuja. Wšo to běchu přičiny za wopyt sakskeje ministerki, zo by na městnje zhoniła, kak tele wužadanja w strowotnistwje roz­risaja.