Zhorjelc. Cyle wosebitu hudźbnu chłóšćenku su spěwarjo chórow zawčerawšim w Zhorjelskim domje Martina Mollera dožiwili. Swětoznaty jendźelski chórowy nawoda a dirigent Nigel Short je jich we wobłuku festiwala Łužica na ekskluziwnu dźěłarničku spěwanja přeprosył. Mjez druhim bě wón w lěće 2001 chór Tenebrae załožił, kotryž liča fachowcy k najlěpšim wokalnym ansamblam swěta. Zarjadowanje běše hač na poslednje městno wuknihowane, wšako mějachu ambicioněrowani wobdźělnicy-spěwarjo jónkrótnu składnosć, bjezposrědnje wot jednoho z najlěpšich dirigentow mjezynarodneje chóroweje sceny wuknyć.
Pod hesłom „The Tenebrae Effect“ znazorni jim Nigel Short swoju wupruwowanu metodu kubłanja hłosa a precizneho zhromadneho spěwanja. Dwě hodźinje dźěłachu wobdźělnicy intensiwnje na tworjenju zwukow, intonaciji a hudźbnej dynamice. Dirigentej so poradźi, mjez wobdźělnikami zahoritosć za dźěło na swojim hłosu zbudźić.
