Nawoda koncerna VW wčera zawodnu zhromadźiznu w Šwikawje wopytał
Šwikawa (dpa/SN/MiP). Po swojim wopyće wutoru we Wolfsburgu je so šef koncerna VW Oliver Blume wčera na zawodnymaj zhromadźiznomaj w Emdenje a Šwikawje wobdźělił. Hladajo na dotalne prócowanja produkciske kóšty znižić, wón před zawodnym kolektiwom na sakskim stejnišću VW wuzběhny: „Sće pokazali, zo je změna móžna. Móžu kóždemu w koncernje jenož rjec: Pohladaj do Sakskeje, kak derje su to tam zmištrowali!“ Zdobom Blume na to skedźbni, zo prócowanja njedosahaja, zo móhł koncern tež w přichodźe w hospodarskim wubědźowanju wobstać. „Dźěłowe kóšty su w Němskej dwójce tak wysoke kaž na podobnych europskich stejnišćach a tež kóšty za wobhospodarjenje fabrikow su w přirunanju přewysoke“, wón znazorni.
