Podstupim (SN/MiR). Wustajeńca fotografijow z titulom „Cyle blisko. 99 objektow přichoda z Łužicy“ je tak wuspěšna, zo wostanje hišće hač do 28. septembra tohole lěta w Braniborskim minister­stwje za kulturu w Podstupimje přistupna. Jědnaće absolwentow a absolwentkow kaž tež studowacych šule za fotografiju Ostkreuz je so z prašenjom zaběrało, što je wobydlerjam mjez Błótami a Žitawu kótwica za přichod jich žiwjenskeho ruma. 99 Łužičanow powěda na fotografijach na zakładźe samowuzwolenych objektow wo swojim přichodźe, zdźěli ministerstwo za kulturu. Wustajeńca je w zhromadnym dźěle ze spěchowanskim towarstwom Braniborskeje Techniskeje uniwersity Choćebuz-Zły Komorow (BTU) nastała. Ministerka dr. Manja Schüle rjekny: „Wustajeńca zmóžnja dohlady z jednoho do druheho regiona. Wona pokazuje kachle, busowe zastanišćo, młyn na brunicy, kulku ze škleńcy, model lětadła – ale tež čołmarjow, zahrodkarki, wědomostnikow, dźěći kaž tež hišće pytacych. Wona rěči wo ludźoch, kotřiž we Łužicy bydla a ze swojim objektom swoje a stawizny regiona powědaja – awtentisce a direktnje.“