Dohromady třinaće předstajenjow pod hołym njebjom je Serbski ludowy ansambl (SLA) w lětušej lěćnej sezonje organizował. Kóždu sobotu běše Budyski najwjetši balkon derje wopytany, tola nic tak derje kaž zašłu sobotu.
Budyšin (SN/jp). Při přijomnych, miłych temperaturach je skupina JANKAHANKA na zhromadne spěwanje do kulturneje zahrody při Röhrscheidtowej bašće přeprosyła. Na sobotniše poslednje předstajenje na zahrodźe je tójšto zajimcow přichwatało, zo bychu přijomnu atmosferu z krasnej live-hudźbu dožiwili. Tomas Kreibich-Nawka powita hosći a měnješe, zo tu hišće ženje telko ludźi njebě, kaž sobotu wječor. Dyrbjachu hosći samo domoj pósłać, dokelž by hewak zahroda přepjelnjena była. Wulka ličba zajimcow měješe dwě přičinje. Prěnja bě skupina JANKAHANKA wokoło Józefa Brězana. Woni wuprudźeja dobru naladu, kotraž so na wopytowarjow přenjese a z tym hosći přiwabi. Tamna přičina bě, zo koncertowachu na samsnym dnju kaž staroměšćanski swjedźeń. A tak mnozy wopytowarjo składnosć wužichu, zo bychu dobry cocktail woptali.
