Šiman z pólskim wulkopósłancom saksko-pólske styki rozjimał

Budyšin (SN). Budyski zapósłanc krajneho sejma a europskopolitiski rěčnik frakcije CDU w Sakskim krajnym sejmje Marko Šiman je so w Budyšinje na dźěłowu rozmołwu z pólskim wulkopósłancom w Němskej Janom Tombińskim zetkał. W srjedźišću rozmołwow stejachu dalše zhromadne dźěło mjez swobodnym statom Sakskej a Pólskej kaž tež zhromadne projekty we wobłukach hospodarstwo, wědomosć a serbsko-pólske poćahi. „Koo­peracija z Pólskej skići wulke šansy za Hornju Łužicu. Dobre susodstwo a mjezy překročace zhromadne dźěło stej konkretna hospodarska lěpšina za Saksku“, Šiman wuzběhny.