Zašły pjatk zemrě w Ralbicach wučer, fotograf a domizniski slědźer Pawoł Rota.

Narodźi so 18. januara 1932 w Sernjanach. Jako jeničkemu synej kowarskeho bě jemu poprawom přisudźene, zo ma nanej w tutym rjemjesle naslědować. Ale 1950 přizjewi so wón njejapce za kurs internatneje Serbskeje ludoweje uniwersity w Radworju. Tutón bě poprawom za zarjadniskich přistajenych mysleny. Tam nawukny mašinopis a serbsku spisownu rěč, kotruž w nacistiskich lětach w Róžeńčanskej šuli nawuknyć njemóžeše. Na to wopyta tež hnydom kurs za nowo­wučerjow na tamnišim wučerskim wustawje. Wučerješe 1953/1954 w Blunju, Parcowje a Kulowje. Potom pak schori na suchoćinu. Po wulěkowanju njesmědźeše hnydom zaso do šule, dyrbješe sej něšto nowe pytać. Namaka městno w redakciji Serbskeje šule, hdźež z přećelom Benom Kućankom a pod Janom Suchyjom, pozdźišim dźiwadźelnikom, płódne lěta „swojeje uniwersity“ dožiwi.