Budyšin. W běhu jenož dweju tydźenjow wotmějetej so w septembrje hnydom dwaj duelej mjez mustwomaj FSV Budissu Budyšin a VfB Empor Glauchau. W sakskim pokalu kaž tež we wyšej lize NOFV juh přijimuja Budyšenjo zapadnych Saksow na Młynkec łuce.
Najprjedy pokal, potom wyša liga: Zazběh Glauchauskeju hrow twori druhe koło sakskeho pokala. Njedźelu, 6. septembra, w 14 hodź. nastupi FSV Budissa Budyšin přećiwo ligowemu konkurentej na Młynkec łuce. Mjeztym zo měješe mustwo Budissy jako wyši ligist w prěnim pokalnym kole swobodny lós, zahaji so z tym tež za cyłk trenarja Steva Dieske lětuše pokalne wubědźowanje. Jenož dwě njedźeli pozdźišo steji w hrajnym planje zasowidźenje. Njedźelu, 20. septembra, w 14 hodź. nastupi VfB Empor Glauchau znowa na Młynkec łuce, tónraz na 5. hrajnym dnju wyšeje ligi NOFV juh.
