Přihotowanski wuběrk Mjezynarodneho folklorneho festiwala „Łužica“ je so wčera w Chrósćicach zešoł. Čłonojo ­zaběrachu so z prěnimi požadanjemi wobdźělnikow, a tych je hižo tójšto.

Chrósćicy (SN/BŠe). Wot 8. do 11. julija 2027, to je klětu spočatk sakskich lěćnych prózdnin, wotměje so we Łužicy znowa mjezynarodny folklorny festiwal. Přihoty za to su dawno zahajene. Wčera zaběrachu so čłonojo z prěnimi požadanjemi skupinow. Jich je hižo 25 dóšło. „Zajim je po cyłym swěće. Dóstachmy požadanja tež z Koreje, Afriki a Južneje Ameriki“, ko-předsyda přihotowanskeho wuběrka Pětr Brězan zdźěli. Nětko sćelu skupinam naprašnik, zo móhł wuběrk wo jich repertoiru zhonić.