Wopomnišćo w Słonej Boršći stanje so njedźelu z městnosću žiwjenja

Słona Boršć (SN/MiR). Na wuchodnej kromje Słoneje Boršće leži nimale 270 metrow wysoki Tchór (Chorberg). Na jeho wjeršku steji wjedrowa stacija a blisko njeje je pomnik, kotryž dopomina na 43 žonow židowskeho pochada, kotrež běchu nacionalsocialisća w lěće 1945 na smjertnym pochodźe z Auschwitza do Buchenwalda na tymle městnje morili. Byrnjež tam dwurěčne pućniki stali, so jenož­ mało ludźi trochu schowaneje pěskoweje jamy dohlada. To ma so přichodnu njedźelu, 6. septembra, změnić. Dopołdnja napoł jědnaćich wotměje so tam wopomnjeće we wobłuku festiwala „kommen und gehen“ Zwjazka šesćiměstow, kotrehož předsyda je Hans Narva.

W Słonej Boršći je jedna ze stacijow busoweje ekskursije k městnosćam přesćěhowanja Židow kaž tež nuzoweho dźěła w dobje nacionalsocializma w Hornjej Łužicy. Nimo toho dojědu sej wobdźělnicy do Kamjenca-Herrentala, Bu­dyšina, Hainewalde a Zhorjelca. Na wopomnjeće w Słonoboršćanskej pěskowej jamje su nimo nich wšitcy zajimcy přeprošeni, wosebje tež Serbja a wobydlerjo wokolnych wsow.