Danska prócuje so, z indigenej skupinu Inuit na Grönlandskej nowe poćahi natwarić. Móža woni statej dowěrić? Abo dźe jenož wo strategiju, kak móhła Danska kónčinu před wliwom USA škitać?

Kopenhagen/Nuuk (SN/LuNo). Danski parlament Folketing je kónc žnjenca zakoń schwalił, kiž grönlandskim žonam wotškódnjenje we wysokosći 300 000 danskich krónow (něšto wjac hač 40 000 eurow) přiznawa, hdyž přizjewja, zo bu jim mjez lětami 1960 a 1991 bjez připrajenja spirala implementowana, kotraž samodruhosći zadźěwa.

Nowostku je parlament z wulkej wjetšinu wobzamknył – mjez 100 zapósłancami je jenož dźesać čłonow populistiskeje strony Dansk Folkeparti přećiwo tomu hłosowało. Wuslědk je dalši pospyt Danow, poćahi z wuznamnej narodnostnej mjeńšinu w času dźeń a wjetšeho zajima Ameriki za najwjetšu kupu swěta ponowić. Faktisce chcedźa sej Danojo loyalnosć Grönlandźanow kupić. A to funguje, wšako su prěnje Inuit-žony próstwu wo pjenjezy hižo zapodali. Loni běše so danska ministerska prezidentka Mette Frederiksen pola nich diskriminacije danskeho stata dla zamołwiła.