W běhu prózdninow smy so na 25. róčnicu Chróšćan zběžka dopominali. Z nim je zwjazana tež přitomnosć wučerja čěšćiny w Serbach jako jedyn z mjezynarodnych wuslědkow tehdyšich po­dawkow. Najskerje móžemy z wěstej hordosću­ prajić, zo je tutón projekt woprawdźe wuspěšny: Zajim za čěšćinu mjez dźěćimi je wobstajny a poprawom stupa, kaž je tež lětsa Jana Štillerová při zetkanju z čěskim wulkopósłancom na Serbskim­ gymnaziju naspomniła. Na druhim boku su so čěscy wučerjo w Serbach zadomili, bydla tu, skutkuja sobu w serbskim žiwjenju a jich dźěći chodźa do serbskich šulow. To je tak pola naspomnjeneje Jany, ale runje tak pola Pavela Šlechty, kotryž tež pola Chróšćanskich muzikantow trompetu piska. Jeho naslědnik Jan Breindl bě mjez druhim z prěnim čěskim křižerjom a piska na pišćelach. To su powšitkownje znate fakty.­ K nim najskerje tež słuša, zo je tuchwilny­ wučer čěšćiny Jiří Jonák jako prěni dotalnu tradiciju přetorhnył a w Serbach njebydli. Město toho ze swojeje domizny w sewjernej Čěskej prawi­dłownje do Hornjeje Łužicy jězdźi.