Spisowaćel Jurij Koch powěda, kak móže serbšćina němčinu wobohaćeć a kak přichod serbskeje literatury widźi

Spisowaćel, nowinar, rozhłosownik, dramatikar Jurij­ Koch změje 15. požnjenca wuznamny jubilej: 90. narodniny. Na jeho česć předstajimy wurězk z dołheho interviewa, kotryž bě Lukáš Novosad z nim na jeho zahrodźe w Žylowje w smažniku 2020 nahrawał. Dospołny tekst je dotal jenož čěsce w časopisu za literaturu Souvislosti w lěće 2023 wušoł.

Sće rodźeny katolski Hornjoserb, ale wjac hač połsta lět w Delnjej Łužicy skutkujeće a sće tam žiwy. Čujeće so dźensa skerje jako Hornjo- abo jako Delnjoserb?

Jenož jako Serb. Ale tuta tema je překomplikowana, dokelž my tón partikularizm, kiž tak a tak eksistuje přez historiske procesy, hišće powjetšimy přez to zo chcemy so sami dźělić. Wězo sym hustodosć słyšał, zo sym takrjec pósłany wot Domowiny před połsta lětami do Delnjeje Łužicy był, zo bych ju sorabizował a tak dale. Ale to su hłuposće, z kotrymiž sym so mjeztym wotnamakał. Potajkim skerje so jako­ tajki posrědkowar čuju.