Drježdźany (SN/MiP). Zarjadniske sudnistwo w Drježdźanach je Budyskemu wokrjesej wčera dowolnosć sakskeje krajneje direkcije za wu- kaž tež nowotwar tak mjenowaneje Sprjewineje dróhi mjez Sprjejcami a Nowym Městom sćazało. Přećiwo planam tak mjenowaneho druheho twarskeho wotrězka je mjez druhim sakska krajna wotnožka Zwjazka za wobswět a přirodoškit (BUND) skoržiła. Podpěrowali su skóržbu lokalne wobydlerske iniciatiwy a towarstwa kaž Nowoměšćanske towarstwo Předźernja, kotrež je tež z čłonom Zeleneje ligi, abo přirodoškitny zwjazk Němskeje (NABU) w Běłej Wodźe.
Jako nošer 30 milionow eurow droheho twarskeho projekta měješe Budyski wokrjes z wutwarom něhdźe 5,2 kilometraj dołheho wotrězka dróhi dwaj wulkej zaměraj: Sprěnja chcyše direktny a spěšny zwisk mjez industrijnym parkom Čorna Pumpa a milinarnju w Hamorje stworić, kotryž je za ćežki wobchad kmany. A zdruha měješe so z tym zdobom wobchadej wulkich nakładnych awtow přez Nowu Wjes, Sprjejcy a Nowe Město zadźěwać.
