Na 70. kongresu FUEN schadźuja so zastupjerjo europskich mjeńšinow

Helsinki/Helsingfors (SN/MG). Federalistiska unija europskich narodow (FUEN) je wčera swój kóždolětny kongres zahajiła. Prěni raz schadźuje so wjace hač 200 delegatkow a delegatow lětsa w finskej stolicy Helsinki. Kongres wuhotuje FUEN 70. raz.

Na zahajenju porěča mjez druhim měšćanosta Helsinkow Daniel Sazonov. Wón wuzběhny, zo drje je finska stolica jedne z najlěpšich městnow za wuměnu wo prašenjach mjeńšinow. Helsinki, ale tež Finska scyła, su mjenujcy dobry přikład za derje fungowacu dwurěčnosć. Hačrunjež jenož něhdźe pjeć procentow Finow šwedsce rěči, stej wobě rěči runohódnej hamtskej rěči kraja. Dohromady pak rěča ludźo w Helsinkach dźensa wjace hač 160 rěčow, štož je raz mjeńše raz wjetše wužadanje za město, tak Sazanov.