Posledni swojeho rjemjesła po cyłej Němskej – kartograf dr. Rolf Böhm

Někotři přećeljo pućowanja su přewšo zadźiwani, hdyž po zakuzłanych a romantiskich šćežkach w chětro njeznatych kutach Saksko-čěskeje Šwicy abo Žitawskich horow nóžkuja­ a naraz dr. Rolfa Böhmu z jeho utensilijemi za kartografiju zetkaja. Nětko 68lětny posledni profesionalny moler kartow za pućowanje w Němskej je zaso po puću, zo by jednu ze swojich mjeztym 23 z ruku rysowanych pućowanskich kartow aktualizował. „Wšako so přiroda pomału, poněčim abo tež naraz – škodow dla, na přikład skórnikow abo lěsnych­ wohenjow kaž w lěće 2022 – měnja. To mam wězo zapopadnyć“, je přeswědčeny. Tónle narok wón prosće ma.