„Chcu na kóždy pad jónu Macbeth hrać“, praji nowy dźiwadźelnik Němsko-Serbskeho ludoweho dźiwadła Alexander Diosegi. „Lubuju Shakespeara a jeho rěč“, 27lětny wuswětla. Kruch jeho fascinuje. Předewšěm je to mnohostronskosć, kotraž rodźeneho Goslarčana na dźiwadźelenju zahorja: Kóždy dźeń, kóžda proba a kóžde předstajenje je hinaše.

Zo chce so z dźiwadźelnikom stać, je Alexander Diosegi hižo zahe wědźał. Hraješe w hodownej hrě a pozdźišo w dźiwadłowej skupinje swojeho gymnazija sobu, je wjele čitał a so hižo jako dźěćo za stawizny zajimował. „To je powołanje mojich sonow.“ Tež za film so zahe horješe. W lěće 2014 zezna skerje připadnje iniciatora młodźinskeje filmoweje dźěłarnički w Saksko-Anhaltskej. 2017 so sam prěni raz na njej wobdźěli a zezna tam mnohich dźiwadźelnikow. Pozdźišo je činohru w Lipsku studował. Po tym skutkowaše dwě lěće w Statnym dźiwadle w Drježdźanach, hdźež zdobom swój studij zakónči.