Oratorij „Wulkotna woda“ zwiski mjez Čechami a Serbami skrućił

Budyšin/Liberec (SN/MiR). Předstajenje oratorija „Wulkotna woda“ z kompozitoriskeho pjera Měrćina Weclicha na teksty Róže Domašcyneje běše njedźelu w Liberecu wjeršk dźesaćlětneho jubileja Societas Amicuum Liberec (SAL). Towarstwo spěchuje mjezsobne zrozumjenje a zhromadne dźěło čěskeho a serbskeho naroda. Koncertny rum tamnišeje Techniskeje uniwersity skićeše 1. serbskej kulturnej brigadźe dobre wuměnjenja a z tym naby přewšo zrozumliwje zanjeseny tekst wosebitu hódnotu. Pod nawodom mjezynarodnje skutkowaceje dirigentki Judith Kubicec hudźachu Serbska komorna filharmonija, band „Johannes und Die Gerstengarbe“ a „Second Line Combo“. Městopředsydka SAL Jana Vančatová witaše wšitkich hosći, mjez kotrymiž běchu předsyda Domowiny Dawid Statnik, komponist Měrćin Weclich a fotograf Maćij Bulank. Wona spominaše na iniciatora towarstwa Milana Tureka. Ze stron Serbow staj z nim cyle na spočatku mandźelskaj Bjarnat a Monika Cyžec zwisk wudźeržowałoj.