Berlin (SN). Społnomócnjeny Swobodneho stata Sakskeje pola Zwjazka Markus Franke (CDU) a egyptowski wulkopósłanc a zastupowacy wonkowny minister za migraciju a naležnosće egyptowskich wu­pućowarjow Nabil Habashy staj wčera w egyptowskim wulkopósłanstwje w Berlinje wosebite dojednanje podpisałoj. Wone ma zdobywanje kwalifikowanych ludźi z Egyptowskeje za předewzaća w Sakskej přisporjeć a jim zdobom jasnu, fairnu a dołhodobnu powołansku a žiwjensku perspektiwu zaručić. W swojej wčerawšej nowinskej zdźělence skedźbnja Sakske statne ministerstwo za hospodarstwo, dźěło, energiju a škit klimy, zo słuša Egyptowska k preferowanym regionam za zdobywanje fachowcow, kotrež chce sakski kabinet hladajo na demografiske wuwiće wutwarić. Při tym je woběmaj stronomaj wažne, zo njeje nowa kooperacija prosta naprawa rekrutěrowanja. Tomu wotpowědujo chce Sakska Egyptowskej zasady dualneho wukubłanja posrědkować.