Najebać rabat płaćizny za bencin a diesel dale stupaja

Pančicy-Kukow/Praha/Waršawa (SN/StŠ). Hdy je ćěriwo wosebje tunje, hdy njeměł na žadyn pad tankować a kelko wučinja, hdyž swoje awto w Čěskej abo Pólskej natankuješ? Mjeztym je tankować kusk kaž loto hrać. Njehodźi so dočasa prajić, hač sy w prawym wokomiku tankował abo nic. A hačrunjež w Němskej wot spočatka měsaca lětsa hižo wo­spjet tak mjenowany rabat na ćěriwo płaći, njejsu płaćizny přejara spadnyli. „To za­leži na tym, zo su płaćizny na swěto­wych wikach dale wysoke. A dołhož bencin a diesel droho nakupujemy, njemó­žemy jej tunjo wotedać. To je mjerzace, ale tak to nažel je“, wujasni Mario Berndt, zamołwity mjez druhim za tankownju w Pančicach-Kukowje. Mjeztym zo wulke zawody swoje płaćizny awtomatisce zwyša a zniža, čini Mario Berndt to za tankownje w Lubnjowje, Kamjencu a Pančicach dale manuelnje. „Wězo při kóždym zwyšenju sobu ćerpju, wšako mje to tež potrjechi, runje tak kaž kóždeho druheho. Změnju płaćizny druhdy wosom do dźewjeć króć wob dźeń. Hdy je wosebje tunjo, so při tym hižo wěsće prajić njeda.