Naćisk za cokorowy dawk chce zwjazkowy kabinet dźensa hišće schwalić
Berlin (dpa/SN). Čorno-čerwjena koalicija je so wčera wječor na kompromis k planowanemu zawjedźenju dawka na napoje z cokorom dojednała. Kanclerski zarjad bě kónc awgusta wot zwjazkoweho financneho ministra Larsa Klingbeila (SPD) předpołoženy prěni naćisk před tydźenjomaj wotpokazał, dokelž „njeje wjetšinykmany“. Nětčišu předłohu chcedźa po informacijach němskeje powěsćernje dpa dźensa w kabineće wobzamknyć.
Po nowym naćisku chcedźa dawk na cokorowane napoje klětu 1. julija zawjesć. Za napoje z 5 gramami cokora na 100 mililitrow płaći dawkowa sadźba 26 centow, za napoje z 8 gramami cokora na 100 mililitrow maja producenća 32 centow dawka płaćić. Mjeńši producenća, kotřiž lětnje pod milionu litrow cokorowanych napojow zhotowjeja, su wot dawka wuwzaći.
