Drježdźany (SN). Sakske dawkowe zarjadnistwo je dalšu wažnu kročel do směra na digitalizaciju zdokonjało. W swojej wčerawšej nowinskej zdźělence piše sakske financne ministerstwo, zo ma něhdźe 5 250 zarjadnikow wot spočatka tydźenja noweho sobudźěłaćerja poboku, mjenujcy KI-chatbota z mjenom MAXi. Wirtuelny asistent ma jim čas rubjace rutinowe nadawki wotewzać, tak zo móža so wobdźěłanju kompleksnych jednotliwych padow wěnować.

Konkretny wobłuk, w kotrymž chcedźa chatbot zasadźować, je na přikład wobdźěłanje spřećiwjenjow dawkipłaćerjow. Dohromady 167 459 tajkich mějachu zarjadnicy loni wobdźěłać. Nětko móže jich MAXi při tym podpěrować, mjez druhim při analyzy pismow, zhotowjenju zjimanjow abo naćiskow za wotmołwy. „Zamołwitosć za fachowe pohódnoćenje kaž tež doskónčny rozsud w dawkowych naležnosćach pak zwostanu w rukach zamołwitych fachowcow“, wuzběhnje ministerstwo.