Namrěwstwo Grussa

Mały Wjelkow. Pod hesłom „Herbstwo Franza Grussa“ přeprošuje Małowjelkowski prazwěrjenc zajimcow jutře, sobotu, na tak mjenowanu ponuchansku turu po swojim parku. W srjedźišću steji prašenje, kak su so dinosawrije do Małeho Wjelkowa dóstali. Tura měri so předewšěm na dźěći a započnje so w 10.30 hodź. Popłatk wučinja 10 resp. potuńšeny 8 eurow.

Floppy Dolls w Meji a na Hrodźe

Radwor. Němsko-Serbske ludowe dźiwadło prezentuje jutře, sobotu, rewiju „Juhu! Floppy Dolls su zaso tu“ w Radworskim hosćencu Meja. Předstajenje započnje so w 17 hodź., zastup płaći 16 resp. potuńšeny 10 eurow. Přichodny pjatk zapiskaja Floppy Dolls w 19.30 hodź. w Budyskim Dźiwadle na hrodźe. Zastup płaći 19 resp. potuńšeny 13 eurow.

Shawue w bróžni

Kamjenc. De Shawue mjenuje so duwo Heike a Lutz Neumann, kotrajž wuhotujetaj zajutřišim, njedźelu, tak mjenowany kłobukowy koncert w Jěžowskej bróžni. Program wopřijima mjez druhim spěwy Boba Dylana, Toma Waitsa abo Neila Younga a wězo tež wuběr titulow skupiny Shawue. Zarjadowanje započnje so w 15 hodź. a wotměje so dospołnje z pomocu darow.