Zwjazkowa rada a Zwjazkowy sejm stej minjeny tydźeń změnu zakonja wo swobodźe wědomosće wobzamknyłoj. Z njej polěpša so wuměnjenja za zjawnje spěchowane slědźenišća, mjez druhim tež za Astrocentrum Łužica (DZA).

Drježdźany (SN). Sakski minister za wědomosć Sebastian Gemkow (CDU) rozsud wita. Wón wuzběhnje w pjatkownišej zdźělence ministerstwa, zo je wu­bědźowanje wo najlěpše ideje a wo najlěpšich fachowcow za wědomosć nje­parujomne. Němska a Sakska dyrbitej tuž atraktiwne wuměnjenja za wědomostnikow ze wšeho swěta wutworić. Tak móža sej talentowanych fachowcow zdobyć a dołhodobnje dźeržeć.

Wažna změna je, zo stej wulkej sakskej slědźenišći DZA a Centrum za transformaciju chemije (CTC) w Deliču (Delitzsch) nětko w zakonju wo swobodźe wědomosće zapřijatej. Přez to matej wjace swobody nastupajo wužiwanja swojich spěchowanskich srědkow. Na přikład móža njewužiwane pjenjezy do klětušeho přenjesć. Nimo toho stej fleksibelnišej při planowanju personala a njejstej hižo na krute plany městnow wjazani.