Sakska chce wuwzaćnu spěšnosć Simsona na druhe modele rozšěrić

Drježdźany/Róžant/Pančicy-Kukow (SN/MiP). Mopedy z NDRskeho časa marki Simson maja mjez młodostnymi we wuchodnych zwjazkowych krajach kultowy status, a to njewotwisnje wot kampanjow AfD w minjenych lětach. Tež mjez serbskimi młodostnymi su ikoniske jězdźidła jara woblubowane. Jich maksimalna dowolena spěšnosć je – porno druhim mopedam samsneje klasy – 60 km/h město 45 km/h.

Za šulerja 10. lětnika Józefa Mittaga z Róžanta běše tole wažny aspekt za rozsud, sej tajki Simson wobstarać, z kotrymž wšědnje do šule na Budyski Serbski gymnazij jědźe, wón na naprašowanje SN praji. „Moped njeje jenož cool, ale mi so mysl lubi, zo sym ze samsnym jězdźidłom po puću, kaž to mój nan w swojich młodych lětach běše.“ Dalši šuler Budyskeho Serbskeho gymnazija, Jan Hermann z Pančic-Kukowa, praji, zo lubuje wosebity nostalgiski design mopeda, kotryž je „bóle sportowski, hač tón druhich modelow z časa NDR“. Nimo toho zmóžnja jemu moped wjace njewotwisnosće wot staršeju, wón přispomni.