1 600 młodostnych w Sakskej nadal bjez wukubłanskeho městna

Kamjenica/Budyšin (dpa/SN/MG). Hospodarske ćeže mnohich zawodow su přičina za to, zo dale a mjenje młodych ludźi w Sakskej wukubłanske městno nańdźe. 1 600 młodych žonow a muži njeměješe kónc septembra hišće wukubłanske zrěčenje, zdźěla regionalna direkcija Zwjazkoweje agentury za dźěło ze sydłom w Kamjenicy. W Budyskim wokrjesu bě dohromady 150 młodo­stnych bjez wukubłanskeho zrěčenja, agentura na swojej internetowej stronje piše. To je 50 wjace hač loni w septembrje. Tež mnóstwo wukubłanskich městnow we wokrjesu je lochce spadowało, cyłkownje je jich nětko hišće dokładnje 1 500 na wuběr. To je 40 mjenje hač loni a 90 mjenje hač před lětomaj. Dohromady dźesać wukubłanskich městnow hišće wobsadźenych njeje. Po cyłej Sakskej je lětsa prěni raz po lěće 2009 zaso wjace młodostnych bjez zrěčenja hač je wukubłanskich městnow k dispoziciji, rjekny nawoda regionalneje direkcije Klaus-Peter Hansen. Wón młodostnym radźi, sej stajnje plan B za swoje wukubłanje pytać.