Region Vojvodina na sewjeru Serbiskeje bě w 16. a 17. lětstotku wot Osmanskeho mócnarstwa wobsadźeny. Jako pak Awstričenjo tule spočatk 18. lětstotka knježachu, běchu nowi zasydlency trěbni. Přišli su Južni Serbja, Madźarojo, Rumunojo, Rusynojo – nimo nich pak tež Słowakojo. Dźensniša Vojvodina deklaruje a hordźi so tuž z prawom jako multietniski a multikulturny region.
Prěni słowakscy zapućowarjo přińdźechu do Vojvodiny w 1. abo 2. połojcy 18. lětstotka a natwarichu sej tam sydlišćo Báčsky Petrovec, tež dźensa hišće přewažnje słowakske. Wot 19. lětstotka nastawachu dalše enklawy, w kotrychž su so maćerna rěč, identita kaž tež kultura derje zadomili. Zwiski z domjacym krajom trajachu tež po lěće 1918 – w času Čěskosłowakskeje. Po nastaću samostatneje Słowakskeje (1993) su hišće hłubše. Po ličbje sylna kaž tež narodnje wuwědomjena słowakska ludnosć we Vojvodinje wuprudźa tak atmosferu „alternatiwneje Słowakskeje“.
